05/05/2023.- Teatru, conciertos, podcast en directo, conferencies o micromappings son dalgunes de les actividaes incluyíes nel circuitu de cultura tradicional d’Asturies, Cultura en Rede p’adientrase na historia, patrimoniu, etnografía y tradición de la nuestra rexón mientres les selmanes vinientes.

Factoría Norte va representar histories de la tradición asturiana en Picotuenta en Noreña (5 de mayu); Higiénico Papel Teatro va amosar les sos Chanzas, caminos y peregrinos en Llanera (11 de mayu); y Carlos Alba va llevar Cellero el monologuista a Muros del Nalón (12 de mayu).

El grupu El Arca de Mozart va percorrer el Camín de Santiago con Dientitos, el primer conegrino en Villaviciosa (6 de mayu); Toli Morilla va xuntar la música cola poesía de delles de les autores asturianes más destacaes en Mujeres poetas en canciones en Grau (13 de mayu); Los Gascones van actuar en Cabrales (13 de mayu) y en Bimenes (25 de xunu); y la Orquesta Céltica Asturiana va presentar n’El Franco (19 de mayu) un reportoriu de temes tradicionales en La Céltica: Conociendo Asturies, un espectáculu presentáu por Xurde Morán. Esemble L’Arca va facer un percorríu por cantares tradicionales en Cántote, que si te conto nun me crees en Cangas (26 de mayu); Héctor Braga va viaxar musicalmente pel pasáu recién de l’asturianada en Llanes (9 de xunu) y Silvia Quesada, Rubén Bada y Leticia Baselgas van unise pa ufiertar música tradicional asturiana en Siero (23 de xunu).

Les periodistes Aitana Castaño y Marta Pérez van grabar Dalle mio nena de Melodijpérez, el primera podcast rural en clave femenina d’España, en Yernes y Tameza (6 de mayu), en Balmonte (20 de mayu) y en Ribedeva (15 de xunu); Pablo Canalís va repasar la Historia de los instrumentos musicales: folclore, tradición y globalización en Cangas (22 de mayu); y l’Asociación d’Amigos del Horru Asturianu va guiar la visita Baxo l´horru en Mieres (3 de xunu).

Los Ferreiros de Mazonovo van impartir un taller p’averar a tolos públicos a la forxa d’una manera amena y práctica na Veiga (9 de xunu), Educa y Cine va resaltar el patrimoniu audiovisual asturianu en Lumière por Asturias en Navia (9 de xunu) y Roberto Lorenzo (AV Sudio) va facer micro-mappings sobre patrimoniu n’Ayer (24 de xunu).

Amás, la Federación Asturiana de Bolos va esplicar la modalidá de cuatriada en Mi güelu jugaba a los bolos… y yo tamién en La Ribera (10 de xunu) y Cuatro Gotes Producciones va falar sobre ¿Qué ye eso de la toponimia? en Bimenes (27 de xunu).

Nel marcu del circuitu de cultura tradicional programáronse 50 eventos de 32 profesionales en 34 conceyos pal primer semestre del añu. Los circuitos d’Asturies, Cultura en Rede son un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d'Asturies.